Հոլանդական Սլավույը երգում էր հայերեն. Կոմիտասի 150-ամյակին նվիրված համերգին Էջմիածնի Մաչանենց տանը «Սլավույ» խումբը կատարեց հայկական ժողովրդական երգեր (խմբավար` Իվո Բոսվյակ):

Հոլանդական Սլավույը երգում էր հայերենՄայիսի 3-ին էջմիածնի օդը լցված էր կոմիտասյան շնչով, բայց սովորականից տարբերվող. Կոմիտասյան տարվա շրջանակում Հայաստանում էին հոլանդական «Սլավույ» երգչախումբը և «Zwarte Zee» նվագախումբը, որոնք յուրահատուկ կերպով շնորհավորեցին Վարդապետի 150-ամյակը:
Մաչանենց տանը կայացած համերգի ընթացքում խմբերը կատարեցին Կոմիտասի և հայկական ժողովրդական երգեր, առաջացնելով ներկաների զարմանքն ու հիացմունքը: Հոլանդացիների մեկնաբանմամբ հնչեց «Էրզրումի շորորը», «Ծաղկած բալենին», «Սարերի հովին մեռնեմ», «Ծամերով պար», «Հով արեք սարեր ջան», «Ադանայի ողբերգ», «Կռունկենր» և բազում այլ սիրված ստեղծագործություններ։ Հուզմունքն ամբողջ ընթացքում ընկերակից էր հյուրերին, «պատճառն» էլ երգիչների ճիշտ առոգանությամբ և շեշտադրումներով կատարումներն էին:
Համերգը կազմակերպվել էր Նիդերլանդներում բնակվող քանոնահարուհի Ռուզաննա Հակոբյանի և նրա ամուսնու ջանքերով:
Համներգին ներկա էին Տեր Զաքարիա ծայրագույն վարդապետ Բաղումյանը, էջմիածնի քաղաքապետ Դիանա Գասպարյանը, սփյուռքի և մշակույթի նախարարության ներկայացուցիչներ և բնակիչներ:
«Աստծո հետ խոսելու լեզուն հայերենն է և Ձեր շնորհիվ մենք այսօր խոսեցինք Աստծո հետ»,-դիմելով երաժիշտներին, իր երախտագիտությունը հայտնեց «Հայ Միասնության Խաչ»-ի հիմնադիր Գրիգոր Մաչանենց Բաբախանյանը: Կոմիտասը ազգային և համաշխարհային արժեք է, և մայրերը պետք է մանկուց սերմանեն այն երեխաների մեջ, առավոտյան նախաճաշի հետ մատուցելով նաև Կոմիտասի չափաբաժին,-հավելեց նա:
Նա երաժիշտներին նվիրեց խորհրդանշական գրիչ, որը գրում է բացառապես հայերեն: Իր հերթին երգչախումբը անակնկալ էր պատրաստել ՀՄԽ-ին: Կազմակերպությունն իրականացնում է «Արվեստը սոցիալականացման միջոց» նախագիծը, որը միտված է կրթության առանձնահատուկ պայմանների կարիք ունեցող երեխաների սոցիալականացմանը: Ծրագիրը, բավարար ֆինանսավորում չունենալու պատճառով պետք է ավարտվեր օգոստոսին, սակայն երգչախումբը բարեգործական համերգ կունենա Նիդերլանդներում` ամբողջ հասույթը ուղղելով ծրագրին:
Էջմիածնի քաղաքապետ Դիանա Գասպարյանը հայերենով, ապա անգլերենով դիմեց ներկաներին․
«Շնորհակալ եմ հայկական մշակույթը, հայկական արժեքներն այսքան խնամքով ու այսքան գեղեցիկ ներկայկացնելու համար։ Դա խոսում է այն մասին, որ դուք, նախևառաջ, ընկալել եք հայի հոգին, քանի որ կարողացաք ճիշտ ներկայացնել և հուզել հանդիսատեսին։ Մենք հավատացած ենք, որ դուք իսկապես գիտակցում էիք՝ ինչ եք երգում և սա է արվեստի ուժը, որը չի ճանաչում որևէ սահման և ազգություն»։
Իսկ նվագախմբի անդամ Շյուրդ Բակկերի հայերեն շնորհակալական խոսքը բուռն ծափողջույններով ընդունվեց ներկաների կողմից: «Մեզ համար մեծ պատիվ է Հայաստան աշխարհում ձեզ համար երգելը։ Հայերեն երգերն ավելի մեծ նշանակություն են ստանում և մենք առավել լավ ենք հասկանում ու զգում դրանց իմաստ։»-նշեց Շյուրդ Բակկերը։
Խումբը ելույթ է ունեցել նաև Կամերային երաժշտության տանը և Քարահունջի մշակույթի տանը: Համերգների կայացմանն աջակցել են Սփյուռքի եւ մշակույթի նախարարությունները:

Լուսանկարներ