Համայնքի ղեկավար Դիանա Գասպարյանն ընդունել է Հայաստանի Հանրապետությունում Շվեդիայի Թագավորության արտակարգ եւ լիազոր դեսպան Պատրիկ Սվենսոնին:
Այցը ճանաչողական էր դեսպանի համար. սա նրա առաջին պաշտոնական հանդիպումն էր համայնքի ղեկավարի հետ:
Հանդիպման ընթացքում քննարկվել են համագործակցության ուղիներն ընդլայնելու հնարավորությունները, Շվեդիայի Թագավորությունում հայկական համայնքի ներուժն օգտագործելու, ծրագրերի մշակման հեռանկարները։ Շոշափվել է շվեդական «Սալար ինթրնեյշնլ» կազմակերերպության՝ «Դպրոց-համայնք» ծրագրին մեր համայնքի դպրոցների մասնակցության կարեւորությունը եւ հնարավոր արդյունքները:
Համայնքի ղեկավարը դեսպանին ներկայացրել է պաշտոնավարման ընթացքում քաղաքում կատարված աշխատանքներն ու փոփոխությունները, խոսել քաղաքի զարգացման տեսլականի, առկա խնդիրների լուծման ճանապարհների, սպասվելիք ծրագրերի մասին։
Տիկին Դիանա Գասպարյանը նաեւ հետաքրքրվել է կենտրոնացված կառավարման շվեդական փորձով՝ քաղաքային նախագծման, տրանսպորտային ցանցի արդյունավետ ստեղծման եւ կառավարման համակարգերով:
Պարոն Պատրիկ Սվենսոնը, շնորհակալություն հայտնելով ընդունելության համար, շեշտել է, որ Էջմիածինը հրաշալի վայր է ծրագրերի իրականացման համար, քանի որ Հայաստանի հոգեւոր կենտրոնը լինելուց բացի, ունի զբոսաշրջային մեծ ներուժ եւ աշխարհագրական բարենպաստ դիրք:
«Այն հանգամանքը, որ Էջմիածինը Հայաստանի հոգեւոր կենտրոնն է եւ զբոսաշրջային գլխավոր ուղղություններից մեկը, կարող է խթան հանդիսանալ համայնքի եւ Շվեդիայի միջեւ ուղիղ համագործակցության ստեղծման համար»,-նշել է դեսպանը:
Հանդիպման ավարտին դեսպանը համայնքի ղեկավարին է նվիրել Շվեդիայի Թագավորության մայրաքաղաք Ստոքհոլմի վերաբերյալ ծավալուն պատկերագիրք:

Լուսանկարներ