Համայնքի ղեկավար Դիանա Գասպարյանի շնորհավորական ուղերձը Գիտելիքի եւ դպրության օրվա առթիվ

Տոներ և հիշատակի օրեր
01.09.2022

Սիրելի՛ աշակերտներ, ուսանողներ, հարգարժա՛ն ուսուցիչներ եւ դասախոսներ, կրթական ոլորտի ներկայացուցիչներ, շնորհավորում եմ Գիտելիքի եւ դպրության օրվա առթիվ:
Այսօր նոր սկիզբ է թե՛ ուսումնառողների, թե՛ դասավանդողների համար: Օրն առանձահատուկ է հատկապես առաջին դասարան հաճախող փոքրիկների համար, որոնց առաջ բացվում են նոր աշխարհի դռներ՝ լի գիտելիքով, բացահայտումներով, հրաշքներով ու հնարավորություններով: Այս ճանապարհին կարեւոր է նրանց ավագ ընկերների՝ ծնողների եւ ուսուցիչների աջակցությունն ու հոգատարությունը, ինչը, վստահ եմ, որ նրանք ստանալու են:
Առանձահատուկ շնորհավորում եմ նաեւ առաջին կուրս հաճախող ուսանողներին, ովքեր սկսում դեպի իրենց նպատակի մասնագիտություն տանող են ճանապարհը:
Այս տարի մեր երկիրը գիտության համաշխարհային կենտրոններից է. օրեր անց կմեկնարկի «STARMUS» միջազգային փառատոնը եւ մի քանի օր շարունակ այստեղ կհուրընկալվեն աշխարհահռչակ գիտնականներ, աստղագնացներ, ֆիզիկոսներ, Նոբելյան մրցանակի դափնեկիրներ: Նրանք մարդիկ են, ովքեր կրթության ու գիտելիքի ուժով փոխել են աշխարհը: Նրանց թվում է նաեւ մեր հայրենակցի՝ Գարիկ Իսրայելյանի անունը, ով այս համաշխարհային փառատոնի համահիմնադիրն է: Եվ շատ հայեր՝ Ռեյմոնդ Դամադյանը, Ալենուշ Տերյանը, Հովհաննես Ադամյանը, Արտեմ Փաթափությանը եւ այլք իրենց ներդրումն են բերել գիտության ու կրթության զարգացման գործին՝ այսպիսով նպաստելով միլիոնավոր մարդկանց կենսամակարդակի բարձրացմանը:
Սիրելի՛ աշակերտներ եւ ուսանողներ, ոչինչ չպետք է ձեզ հետ պահի այն մտքից, որ մի օր ձեր անունը եւս կարող է լինել այս շարքում, եւ դուք կարող եք դառնալ աշխարհն ավելի գեղեցիկ եւ արժեքավոր դարձնող որեւէ հայտնագործության հեղինակ:
Հարգելի՛ աշակերտներ, ուսանողներ, պարզապես անդադար կրթվող անհատներ, կրկին շնորհավորում եմ այս լուսավոր տոնի առթիվ։ Կրթությունն ու գիտությունն են այն բանալին, որը բացում է ապագայի դռները, նոր հնարավորություններ ստեղծում անհատի ու պետության զարգացման համար։

Նորություններ