Սիրելի՜ համաքաղաքացիներ, հարգելի՛ հայրենակիցներ,
Շնորհավորում եմ բոլորիս տոնական այս օրվա՝ Աշխատանքի եւ աշխատավորների միջազգային օրվա առթիվ։ Աշխատանքը բոլոր հասարակությունների առաջընթացի բանալին ու երաշխիքն է, եւ աշխարհի բազմաթիվ երկրներում նշվող այս տոնը վերհաստատում է աշխատավոր մարդու եւ նրա կատարած աշխատանքի կարեւորությունը համայնքի ու երկրի զարգացման գործում։
Ջանասեր հայ ազգը դարեր ի վեր իր աշխատանքով է կերտել մեր երկրի լավագույն ավանդույթներն ու դիմագիծը։ Այդ ճանապարհին կարեւորվել են բոլոր մասնագիտությունները եւ ձեւավորվել է գիտակցումը, որ ցանկացած մասնագետ՝ երկրի սահմանը պաշտպանող զինծառայողից մինչեւ հողի մշակ, մի մասն է կազմում պետականաշինության մեծ համակարգի, որտեղ հավասարաչափ կարեւոր են ե՛ւ մտավոր, ե՛ւ ֆիզիկական աշխատանքը։
Սերն առ հայրենիք սկսում է բարեխիղճ աշխատանքից եւ այն գիտակցումից, որ միահամուռ աշխատանքի արդյունքում միայն կարող ենք ընթանալ մեր սիրելի երկրի բազմակողմանի զարգացման ճանապարհով։
Երախտագիտությամբ`
Վաղարշապատ համայնքի ղեկավար Դիանա Գասպարյան
